इलाम । करिब चार महिनादेखि धुलो र हिलोको सास्ती खेप्दै आएका इलामको फिक्कल बजारबासीले अब राहत पाउने भएका छन्। मेची राजमार्गअन्तर्गत फिक्कल बजारको मुख्य सडकखण्ड पिच हुने भएपछि स्थानीय बासिन्दा, व्यापारी तथा यात्रुले चाडपर्वअघि नै सहजता महसुस गर्ने अपेक्षा गरिएको छ।
ठेक्का लागेर काम सुरु भएको लामो समयसम्म पनि सडक निर्माणले गति लिन नसक्दा फिक्कल बजार क्षेत्रको करिब एक किलोमिटर सडक अलपत्र परेको थियो। सडकको अवस्था बिग्रिएपछि हिउँदमा धुलो र धुवाँले बजार ढाक्ने गरेको थियो भने वर्षायाममा हिलो र चिप्लोपनका कारण आवतजावत गर्न कठिन हुने गरेको थियो।
सडकको दयनीय अवस्थाका कारण स्थानीय व्यापारी, पैदलयात्री, विद्यालय जाने विद्यार्थी तथा दैनिक रूपमा उक्त मार्ग प्रयोग गर्ने हजारौँ यात्रुले सास्ती खेप्नुपरेको थियो। विशेषगरी चाडपर्व नजिकिँदै गर्दा बजारमा किनमेल गर्न आउने सर्वसाधारण र घर फर्कने यात्रुहरूलाई सडकको अवस्थाले थप समस्या निम्त्याएको थियो।
धुलोका कारण बजारका पसलमा राखिएका सामान धुलाम्मे हुने, होटल तथा रेस्टुरेन्ट व्यवसाय प्रभावित हुने र स्थानीय बासिन्दाको स्वास्थ्यमा समेत प्रतिकूल असर पर्ने गरेको थियो। सडकको धुलोका कारण श्वासप्रश्वाससम्बन्धी समस्या बढ्न थालेको भन्दै स्थानीयले समेत चिन्ता व्यक्त गर्दै आएका थिए।
अब मुख्य सडकखण्ड पिच हुने भएपछि फिक्कल बजारको लामो समयदेखिको समस्या समाधान हुने अपेक्षा गरिएको छ। सडक कालोपत्रे भएपछि आवागमन सहज हुनुका साथै धुलो र हिलोबाट मुक्ति मिल्ने, व्यापार व्यवसायमा चहलपहल बढ्ने र सडक दुर्घटनाको जोखिम कम हुने विश्वास गरिएको छ।
इलामको प्रमुख प्रवेशद्वारका रूपमा रहेको फिक्कल बजारको सडक सुधारले बजारको सुन्दरता र समग्र पर्यटन प्रवर्द्धनमा समेत सकारात्मक प्रभाव पार्ने अपेक्षा गरिएको छ। चाडपर्वको मुखमा सडक पिच हुने भएपछि लामो समयदेखि सास्ती भोग्दै आएका बजारबासीले राहत पाउने आशा गरेका छन्।