केही विदेश खेलाडीसहित पाँचौं फिफ्टिन रग्बी लिग च्याम्पियनसिप फागनुको पहिलो सातादेखि काठमाडौंमा हुने भएको छ ।
नेपाल रग्बी संघको आयोजनामा लिग फरम्याटको फिफ्टन रग्बी लिग फागनुको ६ देखि १२ गतेसम्म हुन लागेको हो ।
संघले मंगलवार त्रिपुरेश्वरस्थित राष्ट्रिय खेलकुद परिषद् (राखेप) मा पत्रकार सम्मेलन आयोजना गर्दै प्रतियोगिताको बारेमा जानकारी दियो ।
उक्त प्रतियोगिताका खेलहरू त्रिपुरेश्वरस्थित दशरथ रंगशालामा हुनेछन् ।
तीन विभागीय टोली नेपाल आर्मी क्लव, एपिएफ क्लव र नेपाल पुलिस क्लवका साथै गोर्खाली रग्बी क्लवले लिगमा प्रतिष्पर्धा गर्ने भएका छन् ।
गत संस्करण खेलका कालभैरव रग्बी क्लव र हिमालयन टाइगर रग्बी क्लवले भने यस पटक सहभागिता नजनाउने भएका छन् ।
संघका अध्यक्ष दीपक देवकोटाले रग्बी सेभेन्सभन्दा फिफ्टिन ‘ए’ साइड केही कठिन र रोमाञ्चक हुने भएकाले प्रतियोगितामा सहभागिताका लागि मापदण्ड तय गरिएको र सो मापदण्डअनुरूप नभएका क्लबलको सहभागिता अस्वीकृत गरिएको बताउनु भयो ।
फिफ्टिनको लिग खेल्न २० वर्षभन्दामुनिको खेलाडी रोक लगाइएको अध्यक्ष देवकोटाले बताउनु भयो ।
हरेक क्लवले न्युनतम २१ खेलाडी र अधिकतम् २६ खेलाडी समावेश गराउने मापदण्ड तय गरिएको संघले जनाएको छ ।
एउटा टोलीमा पाँच जना विदेश खेलाडी राख्न पाउने प्रावधान रहेको र गोर्खाली क्लवले पाँच खेलाडीको नाम दर्ता गराएको संघका महासचिव गोविन्द घिमिरेले जानकारी दिनुभयो ।
संघले हरेक क्लवलाई एक लाख ६० हजार रुपैयाँ प्रतियोगिताको तयारीका लागि बजेट उपलब्ध गराएको छ ।
प्रतियोगिताको विजेताले ७५ हजार र उपविजेताले ५० हजार रुपैयाँसहित ट्रफी र पदक पाउनेछन् ।
राष्ट्रिय खेलकुद परिषद् (राखेप) ले प्रतियोगिताका लागि तय गरेको खेलकुद बीमा यस प्रतियोगितामा पनि समावेश गरिएको संघले जनाएको छ ।
