झापा । नेकपा एमालेका अध्यक्ष केपी शर्मा ओलीले एमालेले जिते मात्र देश विकास हुने बताउनुभएको छ ।
उहाँले गठबन्धनले जिते देश बिनाशतर्फ जाने दाबी गर्नुभयो ।
झापा क्षेत्र नं १ अन्तर्गत मेचीनगरमा आयोजित चुनावी सभालाई बिहीबार सम्बोधन गर्दै ओलीले मङ्सिर ४ को निर्वाचनले देशको भाग्य र भविष्य निर्माण गर्नुपर्ने बताउनुभयो ।
निर्वाचन देश जोगाउने शक्ति आउने कि स्वार्थ गठबन्धन आउने भन्नेमा केन्द्रित रहेको बताउनुभयो ।
‘यो निर्णय गर्नुपर्ने छ’, ओलीले भन्नुभयो ।
ओलीले एमालेसँग लड्ने कसैको हिम्मत नभएर गठबन्धन भएको बताउनुभयो ।
एमालेलाई ढाल्ने हिम्मत नभएको कारण गठबन्धन भएको उहाँले टिप्पणी गर्नुभयो ।
जनादेशबाट एमालेलाई ढाल्न नसक्ने भएपछि परमादेश ल्याएको उहाँले बताउनुभयो ।
माओवादीलाई गम लगाएर एमालेमा टाँसेको भए पनि प्रचण्ड टाँसेको पर्चा उक्किए झैँ उक्किएका उहाँले टिप्पणी गर्नुभयो ।
‘एमालेले टाँसेको थियो, प्रचण्ड पक्लक्क उक्किए’, ओलीले भन्नुभयो ।
एमालेलाई रोक्न र राष्ट्रियता, राष्ट्रिय स्वतन्त्रतालाई कमजोर बनाउन अनेक षडयन्त्र भएका ओलीले बताउनुभयो ।
