१९ कात्तिक, काठमाडौं । नेपाली कांग्रेसका सहमहामन्त्री अजयबाबु शिवाकोटीलाई प्रहरीको साइबर ब्युरोले उपस्थित हुन निर्देशन दिएको छ । सामाजिक सञ्जालमा लेखेको विषयलाई लिएर ब्युरोले उनलाई बोलाएको हो ।
शिवाकोटीले आफू धार्मिक यात्राका क्रममा भारत गएको र अहिले इलाम आइपुगेको जानकारी दिएका छन् । प्रहरीले आफ्नो फोनमा सम्पर्क गर्न नसकेपछि निकट साथीमार्फत सन्देश पठाएर उपस्थित हुन भनेको उनले बताए ।
‘म केही दिन धार्मिक यात्रामा भारततर्फ गएको थिएँ । अहिले इलाम आइपुगेको छु । मेरो फोन नलगेका कारण निकट साथीलाई म्यासेज पठाएर मलाई उपस्थित गराइदिनु भनेको रहेछ,’ उनले अनलाइनखबरसँग भने, ‘तर्साउन खोजेको होला । सत्तासँग डराइन्नँ ।’
उनले काठमाडौं फर्किएपछि यस विषयमा कसरी अघि बढ्ने भन्नेबारे निर्णय गर्ने बताए ।
यसैबीच, कांग्रेस सभापति गगनकुमार थापाले आजै पार्टी पदाधिकारी बैठक बोलाएका छन् । बैठकमा समसामयिक राजनीतिक विषयसँगै शिवाकोटीलाई साइबर ब्युरोले बोलाएको विषयले पनि प्रवेश पाउने सम्भावना छ ।