काठमाडौं । बाग्मती प्रदेशको जनस्वास्थ्य प्रयोगशालाका निर्देशक नारायणबहादुर कार्कीमाथि भएको दुर्व्यवहार प्रति बागमती प्रदेश सरकारले आफ्नो ध्यानाकर्षण भएको जनाएको छ ।
सामाजिक विकास मन्त्रालयल बागमती प्रदेशले एक विज्ञप्ति निकाल्दै प्रयोगशालाका निर्देशक कार्कीमाथि भएको दुर्व्यवहारको खेद प्रकट गरेको हो । सामाजिक विकास मन्त्रालय बागमती प्रदेशका प्रवक्ता दिपेन्द्र सुवेदीले बागमती प्रदेशका जनस्वास्थ्य प्रयोगशालाका निर्देशक कार्कीलाई गत शुक्रबार कोभिड १९ निदान तथा नियन्त्रण कार्यका लागि काठमाडौं आउने क्रममा नागढुंगा नाकामा केही व्यक्तिहरुले दुर्व्यवहार गरेको बताए ।
बागमती प्रदेश सरकारले नागढुंगामा सुरक्षा निकायकै उपस्थितिमा लकडाउनको पालना नगरी केही मानिसहरुले प्रयोगशालाका निर्देशकको गाडी रोकेर खानतलासी गरी अभ्रद व्यवहार गरेको समेत जनाइएको छ ।
बाग्मती प्रदेशको सामाजिक विकास मन्त्रालयले सो घटनाको छानविन गरी दोषीमाथि कडा कारबाही गर्न माग समेत गरेको छ ।
उनीमाथि भएको दुर्व्यवहारको भिडियो अहिले सामाजिक सञ्जालमा समेत भाइरल बनिरहेको छ । सो भिडियोमा धेरैले स्वास्थ्यकर्मीमाथि दुर्व्यवहार भएको भन्दै भिडियो लाइभ गर्दै स्वास्थ्यकर्मीको खानतलासी गर्नेहरुलाई कारबाहीको माग गरेका छन् ।
