काठमाडौं । संयुक्त अधिराज्य बेलायतको टीटान एयरवेजले २२८ बेलायती नागरिक बोकेर गन्तव्यतिर उडेको छ । टीटानले पाँच बालबालिकासहित २२८ यात्रु लिएर केहीबेरअघि त्रिभुवन अन्तर्राष्ट्रिय विमानस्थलबाट फर्किएको विमानस्थलका महाप्रवन्धक देवेन्द्र केसीले जानकारी दिए ।
लकडाउनका कारण नेपालमा रोकिएका आफ्ना नागरिकलाई बेलायतले चार्टर्ड उडान मार्फत स्वदेश फर्काइरहेको छ । यसअघि गत चैत २६ र चैत २८ गते पनि टीटान एयरवेजले वेलायती नागरिक लगेको थियो । काठमाडौंमा उसको यो तेस्रो चार्टर्ड उडान हो ।
यसैबीच एयर अरेबियाको कार्गो जहाज पनि शुक्रबार साँझ त्रिभुवन अन्तरराष्ट्रिय विमानस्थल अवतरण गर्नेछ । यो कार्गो उडानमा के कस्ता सामग्री ल्याइएको भन्ने यकिन विवरण आएको छैन । जहाज काठमाडौँ आएर यताबाट रित्तै फर्कनेछ ।
शुक्रबार नै विहान नेपाल वायु सेवा निगम (नेपाल एयरलाइन्स) का २ वाईड बडी जहाज चीनको ग्वाङ्जाओबाट अत्यावस्यक स्वास्थ्य सामग्री लिएर फर्किएका थिए । दुबै जहाज निजी व्यवसायीले चार्टर्ड गरेर सामाग्री ल्याएका हुन् ।
आन्तरिकतर्फ पनि केही उद्धार तथा कार्गो उडान भइरहेका छन् । शुक्रबार नै दिउँसो यति एयरलाइन्सको जहाजले ३५ जना चिकित्सक बोकेर धनगढी उडान भरेको विमानस्थलले जनाएको छ ।
सरकारले सुदूरपश्चिम प्रदेशमा कोभिड–१९ को परीक्षणका निम्ति थप स्वास्थ्य जनशक्ति पठाएको हो । श्री एयरलाइन्सले पनि सिङ्गापुरको लागि कार्गो उडान गर्दैछ । अत्यावश्यक स्वास्थ्य सामग्री लिनका लागि श्रीले जहाज पठाउन लागेको हो । उडान तालिका रहेपनि अहिलेसम्म उडान नभएको विमानस्थलले जनाएको छ । यसअघि पनि श्रीले काठमाडौं–सुडानमा कार्गो उडान गरेको थियो ।
