बिर्तामोड । बिर्तामोड–५ मा रहेको कोहेड एजुकेशन फाउन्डेसनले आफ्नो ३०औं वार्षिक उत्सव तथा अभिभावक दिवस भव्य रूपमा मनाएको गरेको छ । कार्यक्रममा विद्यालयका विद्यार्थी, अभिभावक, शिक्षक तथा स्थानीय व्यक्तित्वहरूको उल्लेखनीय उपस्थिति रहेको थियो ।
समारोहमा विद्यार्थीहरूले विविध सांस्कृतिक कार्यक्रम, नृत्य, गायन, नाटक तथा प्रतिभा प्रदर्शन गरेका थिए । कार्यक्रमका प्रमुख अतिथि तथा शैक्षिक व्यक्तिव हरिचरन बानियाले विद्यालयको शैक्षिक योगदानको प्रशंसा गर्दै गुणस्तरीय शिक्षा प्रदान गर्ने संस्थाको रूपमा कोहेड एजुकेशन फाउन्डेसनलाई अघि बढाउन सबै पक्षको सहकार्य आवश्यक रहेको बताउनुभयो ।
उहाँले विद्यालय प्रशासनले आगामी दिनमा अझ प्रभावकारी शिक्षण प्रणाली लागू गर्न विद्यालयका सबै शिक्षकहरुलाई आग्रह गर्नुभयो । कार्यक्रममा बिर्तामोड नगर शिक्षा उपसचिव तिलचन भण्डारी, बिर्तामोड–५ का वडा अध्यक्ष रोहित प्रसाई, चेम्बर अफ कमर्स केन्द्रिय सदस्य तथा झापा अध्यक्ष ओम विमली, बिर्तामोड पेवसनका अध्यक्ष सुरेन्द्र खरेल लगायतले शुभकामना मन्तव्य राख्नुभएको थियो ।
विद्यालयका प्रधानध्यापक सन्देश ओलीले ३० वर्षको यात्रामा साथ दिने सम्पूर्ण अभिभावक, शिक्षक, विद्यार्थी र शुभेच्छुकहरूलाई धन्यवाद दिँदै आगामी दिनमा अझ उत्कृष्ट शैक्षिक वातावरण निर्माण गर्ने प्रतिबद्धता जनाउनुभयो ।
विद्यालय व्यवस्थापन समितिका अध्यक्ष कमल गुरागाईको अध्यक्षतामा सञ्चालन भएको कार्यक्रमलाई विद्यालयका सह प्रधानध्यापक कमल तिम्सिनाले सञ्चालन गर्नुभएको थियो ।
