काठमाडौं । प्रधानमन्त्री केपी शर्मा ओलीले विषादी परीक्षण रोक्नका लागि भारतीय दूतावासले पठाएको पत्रबारे आफूलाई गुमराहमा राखिएको बताएका छन् ।
प्रधानमन्त्री ओलीले विषादी परीक्षणबारे भारतीय पत्र आएको भएपनि आफूलाई जानकारी नदिएको भन्दै असन्तुष्टि व्यक्त गरे । संघीय मामला मन्त्रालयले राजधानीमा आयोजना गरेको कार्यक्रममा प्रधानमन्त्रीले भने,‘पत्र आएको रहेछ मलाई थाहा थिएन, जनता सामु मलाई झुटो बनाइयो, लज्जित हुनुपर्ने अवस्था बन्यो यसमा मैले क्षमा माग्नु पर्छ । पत्र भारतबाट आएको धेरै दिन अघि रहेछ ।’
प्रधानमन्त्री ओलीले उनलाई झुक्याउने काम जानाजान हो या लापरवाहीका कारण हो खुलिनसकेको बताए। उनले भने, ‘यसबारे म बुझ्नेछु।’ यसअघि प्रधानमन्त्री ओलीले बुधबार राति जनतासँग प्रधानमन्त्री कार्यक्रममा पनि आफूलाई भारतीय पत्रबारे अनभिज्ञ बनाइएको बताएका थिए ।
‘मलाई पछि मात्र थाहा भयो र त्यससम्बन्धमा भारतले कूटनीतिक प्रयासहरू र विभिन्न ठाउँमा संवादहरू अघि बढाएको रहेछ । त्यो कुराबाट पनि मलाई अनभिज्ञ नै राखियो । तसर्थ मेरो जानकारीमा नभएको हुनाले मैले पत्र आएको छैन भनें । तर २३ गते बेलुका मात्र मैले पत्र आएकोबारे जानकारी पाएँ । म त्यसबाट अत्यन्त दुखित छु,’ प्रधानमन्त्री ओलीले बुधबार जनतासँग प्रधानमन्त्री कार्यक्रममा भने,
प्रधानमन्त्री ओलीले २१ गते नेकपाको संसदीयदलमा ‘कस्तो पत्र कसले पठाएको पत्र रु’ भन्दै सांसदहरूमाथि आक्रोश पोखेका थिए । उनले पत्रै नआएको दाबी गरेका थिए । प्रधानमन्त्री ओलीले त्यसो भनेको दुई दिनपछि ९२३ गते भारतीय दूतावासले असार १४ मा नै परराष्ट्र मन्त्रालयलाई सम्बोधन र उद्योग वाणिज्य तथा आपूर्ति मन्त्रालय, कृषि मन्त्रालय र खाद्यप्रविधितथा गुणस्तर नियन्त्रण विभागलाई बोधार्थ दिँदै लेखेको पत्र सार्वजनिक भएको थियो ।
