झापा । नेपाल ब्यापार कर्मचरी संघ (युनिकम) नेपालले होली बिशेष सुरक्षा सम्बन्धी जनचेतनामूलक कार्यक्रम गरेको छ ।
युनिकम झापा जिल्लाको आयोजना तथा बिर्तामोड नगरको सह आयोजनामा शनिबार बिहान बिर्तामोडस्थित दुर्गा मन्दिर परिसरमा जनचेतनामूलक कार्यक्रम गरेको हो ।
जिल्ला ट्राफिक प्रहरी कार्यालय झापा र इलाका प्रहरी कार्यालय बिर्तामोडको सहकार्यमा भएको कार्यक्रममा प्रमुख अतिथि युनिकम नेपालका अध्यक्ष गजेन्द्रबहादुर पौडेलले होली पर्वलाई सभ्य,भब्य र मर्यादित रुपमा मनाउन सबैलाई आग्रह गरे ।
कार्यक्रममा बोल्दै जिल्ला ट्राफिक प्रहरी प्रमुख नवराज न्यौपाने र इलाका प्रहरी कार्यालय बिर्तामोडका डिएसपी सुरज कार्कीले भब्य एवं सुरक्षित तवरले होली पर्व मनाउन आम सर्वसाधारणलाई अनुरोध गरेका छन् ।
कसैको इच्छाविपरीत रङ, लोला,मोसो, केमिकल र फोहरपानी प्रयोग गरेमा कानूनबमोजिम कारबाही गरिने जनाएका छन् । युनिकम जिल्ला अध्यक्ष अपर्णा सापकोटाको अध्यक्षतामा भएको कार्यक्रममा बिर्तामोड ४ का वडाध्यक्ष राहुल शर्मा लगायतले मन्तब्य राखेका थिए।
कार्यक्रममा शान्ति र सुरक्षा र ट्राफिक व्यवस्थापनमा सहयोग पुर्याएको भन्दै इलाका प्रहरी कार्यालय र जिल्ला ट्राफिक प्रहरी कार्यालयलाई प्रशंसापत्र प्रदान गरिएको थियो । साथै कार्यक्रममा सामुहिक होलीसमेत मनाइएको थियो । कार्यक्रममा बिर्तामोड उद्योग वाणिज्य संघका अध्यक्ष राजु न्यौपाने, निर्वतमान अध्यक्ष कुमार भट्टराई, सरसफाई अभियान्ता बिष्णुआचार्य लगायतको आतिथ्यता रहेको थियो ।
