झापा । संविधान दिवसको अवसरमा जिल्ला कारागार झापाका १८ जना कैदीले कैद सजाय माफी पाएका छन् ।
राष्ट्रपति रामचन्द्र पौडेलले देशभरिका ६७० जना कैदीको भुक्तान हुन बाँकी कैद कट्टा गरी सजाय माफी गरेकोमा त्यसमध्ये झापा कारागारका १८ जना परेका हुन् ।
उहाँले ३५ जनाको नाम सिफारिस पठाएकोमा १८ जनाको मात्र कैद सजाय मिनाहा भएको झापा कारागार प्रमुख मोहन पनेरुले बताउनुभयो ।
उहाँका अनुसार कोशी प्रदेशका १८० जना कैदीले कैद सजाय माफी पाएका छन् ।
संविधान दिवसको अवसरमा राष्ट्रपति पौडेलले मंगलबार ६७० जना कैदको सजाय माफी गर्नुभएको छ ।
राष्ट्रपति कार्यालयका प्रवक्ता शैलजा रेग्मी भट्टराईले विज्ञप्ति जारी गर्दै शुक्रबार बसेको मन्त्रिपरिषद्को बैठकको सिफारिस अनुसार बुधबारदेखि लागू हुनेगरी उनीहरुको कैदको सजाय माफी गरेको उल्लेख गरेकी छन् ।
