काठमाडौं । यसवर्ष सरदरभन्दा पानी कम पर्ने मौसम पूर्वानुमान महाशाखाले जनाएको छ ।
यस वर्ष सरदरभन्दा पानी कम पर्ने र तापक्रम सरदर भन्दा बढी हुने मौसमविद् शान्ति कँडेलले बताउनुभयो । नेपालमा यस वर्ष तापक्रम अत्यधिक रुपमा बढेको छ । अझै केही दिन तापक्रम नघटने महाशाखाले जनाएको छ ।
मौसमविद् कँडेलका अनुसार नेपालमा जुन १३ देखि मात्रै मनसुन प्रवेश हुनेछ । केही दिनयता तातो हावा तथा ‘लु’ देशका धेरैजसो स्थानमा देखिएको मौसमविद्हरूले देशभरको तापक्रम बढ्ने बताएका हुन् ।
गर्मीका कारण ‘लु’ लाग्ने, बान्ता हुने, थकाइ लाग्ने, कमजोरी हुने, बढी तिर्खा लाग्ने, टाउको दुख्ने, खुट्टा बाउँडिने, चक्कर आउने, बेहोस हुने, मांसपेशी दुख्ने समस्या देखापर्न थालेका छन् ।
