विराटनगर । नेकपा माओवादी केन्द्रले कोशी प्रदेशमा एमाले नेतृत्वको सरकारलाई दिएको समर्थन फिर्ता नलिने भएको छ ।
माओवादी केन्द्र कोशी प्रदेश संसदीय दलका नेता इन्द्रबहादुर आङ्बोले मुख्यमन्त्री हिक्मतकुमार कार्की नेतृत्वको सरकारलाई दिएको समर्थन तत्कालै फिर्ता नलिने बताउनुभएको हो ।
विराटनगरस्थित प्रदेश सभा भवनमा पत्रकार सम्मेलन आयोजना गरी संसदीय दलका नेता आङ्बोले कोशी प्रदेशमा अन्य प्रदेशको जस्तो राजनैतिक अवस्था नभएको र विशेष परिस्थिति रहेकाले सरकारबाट फिर्ता हुने सम्भावना पनि नभएको बताउनुभयो ।
उहाँले कार्की नेतृत्वको सरकारलाई ६० जना सांसदको समर्थन रहेकाले वैकल्पिक सरकारबारे सोच्न नसकिने बताउनुभयो ।
कोशी प्रदेशमा ४० सिटसहित एमाले बलियो छ । एमाले सरकारलाई समर्थन गरेको राप्रपाको ६ सिट छ ।
माओवादीले एमाले सरकारलाई दिएको समर्थन फिर्ता लिए पनि कोशीमा माओवादी गठबन्धनको सरकार बन्ने सम्भावना न्यून छ ।
सरकारको समर्थन फिर्ता लिएमा मध्यावधि निर्वाचनतर्फ जाने सम्भावना भएपछि माओवादीले सरकारलाई समर्थन फिर्ता नलिने भएको हो ।
