काठमाडौं । राष्ट्रिय स्वतन्त्र पार्टी रास्वपाले केन्द्रीय कमिटी बैठक शुरु भएको छ ।
राष्ट्रपतिमा कसलाई मत दिने,चितवन–२ मा आगामी वैशाख १० गते हुने उपनिर्वाचनको तयारीलगायत विविध विषयमा छलफल गर्न रास्वपाले बैठक बोलाएको हो ।
पार्टी कार्यालय वसुन्धारामा बोलाइएको बैठकमा पछिल्लो राजनीतिक समीकरण,राष्ट्रपति निर्वाचन र चितवन–२ को उपनिर्वाचनबारे छलफल हुने रास्वपाका उपाध्यक्ष डोलप्रसाद अर्यालले जानकारी दिनु भयो ।
राष्ट्रपतिमा नयाँ गठबन्धनबाट नेपाली कांग्रेसका तर्फबाट वरिष्ठ नेता रामचन्द्र पौडेल र नेकपा एमालेबाट सुवास चन्द्र नेम्बाङले मनोनयन दर्ता गराउनु भएको छ ।
कांग्रेस उम्मेदवार पौडेलले शनिबार रास्वपाका सभापति रवि लामिछानेलाई भेटेर आफूलाई सहयोग गर्न आग्रह गरेका गर्नु भएको थियो भने यता नेकपा एमालेले रास्वपालाई पत्र पठाएर आफ्ना उम्मेदवारलाई मतदान गर्न आग्रह गरेको छ ।
गत पुस १० मा बनेको सात दलीय सत्तागठबन्धन भत्किएर राष्ट्रपति निर्वाचनमा आठ दलीय गठबन्धन बनेको छ ।
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’नेतृत्वको सरकार बन्दा रास्वपाले समर्थन गरेकोमा सरकारबाट बाहिरिए पनि अहिलेसम्म समर्थन भने फिर्ता लिएको छैन । राष्ट्रपतिको निर्वाचनका लागि कांग्रेस वा एमालेका उम्मेदवारको प्रस्तावक वा समर्थकमा रास्वपा बसेको छैन ।
