काठमाडौं । नेकपा एमालेका अध्यक्ष केपी शर्मा ओलीले नेकपा माओवादी केन्द्रका अध्यक्ष एवं प्रधानमन्त्री पुष्पकमल दाहाल ‘प्रचण्ड’ले गम्भीर धोका दिएको आरोप लगाउनु भएको छ ।
हातमा चक्कु लिएर फूल लिएको अभिनय गरेको उहाँको टिप्पणी रहेको छ ।
घाइते तथा शहीद परिवारको सम्मानमा आइतवार काठमाडौंमा आयोजित कार्यक्रममा ओलीले प्रचण्डले जसले प्रधानमन्त्री बनायो उसैलाई गम्भीर धोका दिएको बताउनु भयो ।
उहाँले प्रचण्डले अस्तिसम्म आफूसँग छक्याउने भाषा बोलेको आरोप ओलीले लगाउनु भयो ।
‘अस्तिको दिनसम्म मसँग छक्याउने भाषा बोल्नुभयो । तर, पुष्पकमलजीलाई मैले नचिनेको होइन, हातमा चक्कु लिएर बस्नु भएको थियो, फूल लिएको भन्नुभयो ।
चक्कुजस्तो देखिएको होला, तर यो फूल हो भन्नुभयो,’ ओलीले जनयुद्धका सहयोद्धालाई धोका दिनेले आफूलाई धोका दिनु अस्वाभाविक नभएको टिप्पणी गर्नु भयो ।
