अखिल नेपाल फुटबल संघ (एन्फा) ले सहिद स्मारक ए डिभिजन लिगको तयारी तीव्र रुपमा भइरहेको जनाएको छ ।
शुक्रबार ललितपुरमा पत्रकार सम्मेलन गर्दै एन्फाले फागुन १९ गतेबाट सुरु हुने लिगको प्राविधिक लगायत सवै तयारी तीव्र रुपमा भइरहेको जनाएको हो ।
दशरथ रंगशाला, एन्फा कम्प्लेक्स र च्यासल मैदानमा हुने लिग डबल राउण्ड रोबिनको आधारमा हुने एन्फा प्रवक्ता सुरेश शाहले जानकारी दिनुभयो ।
लिगका लागि १४ वटै क्लबले नाम दर्ता गराईसकेको एन्फाले जनाएको छ ।
यस्तै सबै क्लबलाई तयारी खर्चको पहिलो किस्ता १५ लाख उपलव्ध गराइएको प्रवक्ता शाहले बताउनुभयो ।
लिगको पाँचौ चरणसम्मको तालिका सार्वजनिक भइसकेको र त्यसपछि बाँकी तालिका सार्वजनिक हुने उहाको भनाइ छ ।
यस पटकको लिग विजेताले ७५ लाख , दोस्रो टोलीले ५० लाख र तेस्रो हुने टोलीले २५ लाख रुपैयाँ पाउनेछन् ।
फेयर प्ले अवार्डको नगद पुरस्कार वृद्धि गर्दै ३ लाख पुराइएको प्रवक्ता शाहले जानकारी दिनुभयो ।
पत्रकार सम्मेलनमा एन्फाका महासचिव किरण राईले लिगको करिव ५० प्रतिशत तयारी पूरा भएको बताउनुभयो ।
उहाँले पछिल्लो समय फुटबल खेलाडी विदेश पलायन हुनु दुखद भएको भन्दै खेलाडीहरुलाई बर्षैभरि व्यस्त गराउनका लागि यस क्षेत्रलाई चलायमान बनाउने प्रयासमा एन्फा रहेको बताउनुभयो ।
यस बर्ष लिग सम्पन्न गर्न करिव १२ करोड लाग्ने अनुमान एन्फाको छ ।
यसपटकबाट लिगको मोस्ट भ्यालुएबल खेलाडीले ३ लाख, सर्वाधिक गोलकर्ता र सर्वोत्कृष्ट गोलकिपरले २ लाख र इमर्जिङ प्लेयरले १ लाख ५० हजार रुपैयाँ पाउने एन्फाले जनाएको छ ।
