काठमाडौं । त्रिभुवन अन्तर्राष्ट्रिय विमानस्थलमा आज पनि उडान प्रभावित हुने भएको छ ।
क्यालिब्रेसन उडानका कारण विमानस्थलबाट हुने उडान प्रभावित हुने भएको हो ।
त्रिभुवन अन्तर्राष्ट्रिय विमानस्थलमा नयाँ जडान भएका उपकरणको परीक्षणका लागि बिहीवारदेखि भइरहेको क्यालिब्रेसन उडानका कारण आन्तरिक वायुसेवाको उडान प्रभावित हुनेछन् ।
विमानस्थलका प्रवक्ता टेकनाथ सिटौलाका अनुसार बिहीवार क्यालिब्रेसन नसकिएकाले शुक्रवार पनि गर्नुपर्ने भएको छ ।
यसका लागि अहिले १० बजेदेखि १ बजेसम्म र २ बजेदेखि ५ बजेसम्मका लागि नोटिस टु एयरम्यान (नोटाम) जारी गरिएको सिटौलाले बताउनुभयो ।
नोटामको समयमा विमानस्थलबाट हुने उडान तथा अवतरण हुँदैन ।
क्यालिब्रेसन उडानका कारण बिहीवार आन्तरिक वायुसेवाका उडान प्रभावित भए भने आज पनि व्यवस्थापन मिलाउन समस्या पर्ने बुद्ध एयरका सञ्चार संयोजक दीपेन्द्र कर्णले बताउनुभयो ।
