भरत प्रसाई। झापाका केही सामुदायिक विद्यालयहरु पठनपाठन, भौतिक संरचना तथा व्यवस्थापनका हिसाबमा अहिले अब्बल साबित हुन थालेका छन् । केही बर्ष अघिसम्म सामुदायिक विद्यालय भन्ने वितिक्कै अभिभावकहरुले आफ्ना बच्चा भर्ना गर्नका लागि नाक खुम्च्याउने गरेको अवस्थामा अहिले निजी विद्यालयहरुबाट नानीहरु निकालेर सामुदायिक विद्यालयमा भर्ना गर्न थालेका हुन् । विर्तामोड नगरपालिका क्षेत्रका केही यस्ता विद्यालय छन्, जहाँ विद्यार्थी भर्नाका लागि प्रवेश परीक्षा उत्तीर्ण गर्नु पर्छ ।
निजी विद्यालयहरुले अंग्रेजी माध्यममा पठनपाठन गर्ने गराउने हुनाले विगतमा त्यस्ता विद्यालयमा अभिभावक तथा विद्यार्थीको आकर्षण हुने गथ्र्याे ।
तर अचेल विर्तामोडका केही सामुदायिक विद्यालयले अंग्रेजी माध्यममा पठनपाठन शुरु गरेका कारण ती विद्यालयहरुमा विद्यार्थीको चाप बढन थालेको छ । कुनै विद्यालयमा त भर्ना कार्यक्रम रोक्नुपर्ने अवस्था समेत रहँदै आएको छ । देशका कतिपय सामुदायिक विद्यालयहरु विद्यार्थी अभावमा छट्पटाइ रहेका बेला विर्तामोडका देवी मावि, मोहनमाया मावि जस्ता सामुदायिक विद्यालय अहिले विद्यार्थी तथा अभिभावकको रोजाइमा परेका छन् । ती विद्यालयले सुविधा सम्पन्न निजी विद्यालयसंग प्रतिष्पर्धा गरिरहेका छन् ।
देवी माविमा कम्प्युटर विज्ञान, इन्जिनियरिङ तथा अन्य व्यावसायिक विषय पढाइ हुने गरेकाले विद्यार्थीको चाप बर्षेनी बढिरहेको छ । चुस्त व्यवस्थापन, लगनशील शिक्षक, सुविधा सम्पन्न प्राविधिक प्रयोगशालाका कारण देवी माविमा विद्यार्थीको आकर्षण बढ्दै गएको पाइन्छ । अहिले उक्त माविमा ३ हजार २ सय विद्यार्थी अध्ययनरत छन ।
२०१९ सालमा स्थापना भएको देवी माध्यमिक विद्यालय भौतिक संरचना, प्राविधिक श्रोतसाधनको हिसावले झापामै उत्कृष्ट सामुदायिक बिद्यालय रहेको बताउँदै शिक्षण संस्था विधि र पद्वतिमा चल्नुपर्ने प्रधानाध्यापक अम्विका श्रेष्ठ बताउनुहुन्छ ।
सोही अनुसार प्राविधिक विषय पढाइ हुने बिर्तामोड नगरपालिका क्षेत्र रामचोकमा रहेको मोहनमाया माविले पनि उत्तिकै अब्बल सावित गर्दै आएको छ । कम्प्युटर विज्ञान तथा इन्जिनियरिङ जस्ता विषयका कारण विद्यार्थीको आकर्षण पनि मोहनमायामा बढ्दै गएको छ । दुर्गम स्थानका विद्यार्थीहरूसमेत मोहनमायामा आएर अध्ययन गरिरहेका छन् ।
बिर्तामोड नगरपालिका शिक्षा तथा खेलकुद शाखाका प्रमुख तिलचन भण्डारीका अनुसार सरकारी बिद्यालयको शैक्षिक स्तर पहिलेको भन्दा सुधारोन्मुख रहेकाले केही बिद्यालयले फड्को मार्ने अवस्थामा पुगेको र केही शुरुवाती चरणमा रहेकोले सुधार नै हुन नसकेको हो ।
सरकारले झापामा रहेका ३ सय ६५ सामुदायिक विद्यालयमा समान भौतिक संरचना र शिक्षक नियुक्त गरेपनि औलामा गन्नसक्ने विद्यालयले मात्र गुणस्तरीय शिक्षा प्रदान गर्न सफल भएका छन् । अन्य विद्यालयले पनि देवी र मोहनमायाबाट सिक्ने कि ?
