ओमानमा ‘नेपाल भ्रमण वर्ष २०२०’ विषयक अन्तरक्रिया कार्यक्रम सम्पन्न


२९ मंसिर २०७६, आईतवार १३:४५ मा प्रकाशित

काठमाडौं । २०१९ मा नेपाल भ्रमण वर्ष २०२० को सचिवालय तथा नेपाली राजदूतावास मस्कटको आयोजनामा ओमानमा ‘नेपाल भ्रमण वर्ष २०२०’ विषयक अन्तरक्रिया कार्यक्रम सम्पन्न भएको छ ।

ओमानमा रहेका नेपाली समुदायका प्रतिनिधिहरु, वुद्धिजीविहरू लगायत अन्य सरोकारवालाहरुको उपस्थितिमा अन्तरक्रिया कार्यक्रम सम्पन्न भएको हो । अल–फलाज होटल मस्कटमा आयोजित उक्त कार्यक्रममा नेपाल भ्रमण वर्ष २०२० को सचिवालयका उप सचिव राजन पौडेलले भ्रमण वर्षका सम्बन्धमा भए गरेका काम कारवाहीहरू, तयारीहरू, भ्रमण वर्षको लक्ष्य, उद्देश्यका साथै ब्राण्डिङ्ग गाइडलाइनका विषयमा प्रस्तुतीकरण दिएका थिए ।

कार्यक्रममा नेपाली राजदूतवास मस्कटका महामहिम राजदूत सर्मिला पराजुली ढकालले कार्यक्रमको दौरानमा सहभागीहरुबाट उठेका जिज्ञासाहरूको सम्बोधन गर्दै नेपाल भ्रमण वर्ष २०२० लाई सफल बनाउन खाडि क्षेत्रमा रहेका सम्पूर्ण नेपाली समुदायको महत्त्वपूर्ण भूमिका रहने विषयमा जोड दिइन । उनले ओमानमा यो कार्यक्रमको आयोजना गरेकोमा नेपाल भ्रमण वर्ष २०२० को सचिवालयप्रति आभार समेत व्यक्त गरिन । उनले नेपाल भ्रमण वर्ष २०२० को सचिवालयले गैरआवासीय नेपाली संघसँग ‘नेपाल भ्रमण बर्ष २०२०’ लाई सफल बनाउने समझदारी पत्रमा हस्ताक्षर गरिसकेको सन्दर्भमा यसको प्रवर्द्धनका लागि गैरआवासीय नेपालीहरुको महत्त्वपूर्ण योगदान रहनु पर्ने विचार समेत व्यक्त गरिन् ।

कार्यक्रममा सहभागी गैरआवासीय नेपाली समुदाय लगायत उपस्थित सम्पूर्ण महानुभावहरुले भ्रमण वर्षको कार्यक्रमको सम्बन्धमा आफ्ना सुझावहरू सहित चासो व्यक्त गर्दै यसको सफलताका लागि आफ्नो तर्फबाट सक्रिय भूमिका निर्वाह गर्ने प्रतिवद्धता व्यक्त गरे । कार्यक्रममा नेपाल भ्रमण वर्ष सचिवालयका अन्य कर्मचारीहरू, नेपाली राजदूतावास मस्कटका कर्मचारीहरू लगायत ओमानस्थित नेपालीहरू सहित गरी करिब १ सय जनाको उपस्थिति रहेको थियो ।

LEAVE A REPLY

Please enter your comment!
Please enter your name here