काठमाडौं । सत्तारुढ नेकपा र प्रतिपक्षी नेपाली कांग्रेसको विकल्प बन्ने उद्घोषका साथ मधेश केन्द्रीत राजनीतिक पृष्ठभूमिका समाजवादी पार्टी र राष्ट्रिय जनता पार्टी एकीकरणको अन्तिम तयारीमा छन् ।
पदीय जिम्मेवारी बाहेकका अन्य विषयमा लगभग कुरा मिलिसकेको नेताहरुको भनाई छ । प्रदेश–२ मा गत निर्वाचनमा मोर्चा बनाएर लडेका राजपा र समाजवादी पार्टीले एकताका लागि कार्यदल नै बनाएर काम गरिरहेका छन् । तत्कालीन संघीय समाजवादी फोरम र डा. बाबुराम भट्टराईको नयाँ शक्ति पार्टीबीच एकीकरण भएपछि दुई दलबीचको एकताको विषयले थप महत्व पाएको छ । पार्टीको वैचारिक दृष्टिकोणमा खासै फरक मत नभएका यी दुई दलले भित्र–भित्रै धेरै विषय टुंग्याइसकेको नेताहरुको दावी छ ।
लोकतान्त्रिक समाजवादलाई मुख्य राजनीतिक दर्शन बनाएर अन्य शक्तिहरुलाई समेत एकतावद्ध बनाएर लाने लक्ष्यका साथ एकीकरणको विषयहरु अघि बढाइएको छ । राजपा संसदीय प्रणालीको पक्षमा छ भने समाजवादी प्रत्यक्ष निर्वाचित कार्यकारी राष्ट्रपतिको पक्षमा छ । अन्य राजनीतिक मुद्धामा भने दुवै दल एक ठाउँमा उभिएका छन् । अनौपचारिक रुपमा नै करीब एक दर्जन नेताको पदीय व्यवस्थापनको जिम्मेवारी टुंगिने बित्तिकै औपचारिक रुपमा एकीकरणको घोषणा हुने तयारी गरिएको नेताहरुको दाबी छ ।
समाजवादी पार्टीका सहध्यक्ष राजेन्द्र श्रेष्ठ राजपासँग एकताको मुलभुत विषय अनौपचारिक ढंगबाट टुंगिन लागेको भन्दै छिट्टै औपचारिक वार्तामार्फत एकताको टुंगो लाग्ने बताउँछन् । राजपा संयोजक राजेन्द्र महतोले पनि शुक्रबार जनकपुरमा समाजवादी पार्टीसँगको एकता प्रक्रिया निकै अघि बढेको भन्दै अब वैकल्पिक शक्ति निमार्णको अभियान चलेको दाबी गरेका छन् । प्रतिनिधिसभा समाजवादी र राजपा अहिलेका तेस्रो र चौथौ शक्ति हुन् । प्रदेश–२ मा यी दुई दलको सरकार छ । अहिलेको एकता प्रयास ठूला दलहरुलाई चुनौती दिँदै वैकल्पिक शक्तिको रुपमा उदाउने ढंगको छ ।
मधेश केन्द्रीत दलको रुपमा परिचय बनाएका यी दुई पार्टी एकतामार्फत हिमाल र पहाडमा पनि पार्टी विस्तार गरी मुलुकको वैकल्पिक शक्तिको रुपमा उदाउने प्रयत्नमा रहेको दावी गर्छन् । सत्ता राजनीतिलाई मात्र केन्द्रमा राख्ने परिचय बनाएका यी दुई दलप्रति आम मानिसहरुको धारणा त्यति सकारात्मक छैन । मधेशवादको मात्र वकालत गर्ने दलहरु अहिले दिन बित्दै जाँदा आफूलाई पनि रुपान्तरण गर्न खोज्दैछन् । साना साना लोभमै फस्ने यी दलका नेताहरुको पुराना दृष्टान्तले झस्क्याइरहँदा भने यिनका कुरामा सजिलै विश्वास गरिहाल्ने ठाउँ छैन ।
