काठमाडौं । नेपाली कांग्रेसका नेता डा. शेखर कोइरालाले सहकारी ठगीमा मुछिएका गृहमन्त्री रवि लामिछानेको अनुसन्धानका लागि संसदीय छानबिन समिति नबनेसम्म संसद् चल्न नदिने बताएका छन् ।
बाँकेको कोहलपुरमा शनिबार आयोजित कांग्रेस बाँके क्षेत्र नं. १ को सम्मेलनलाई सम्बोधन गर्दै कोइरालाले यस्तो बताएका हुन् । उनले गृहमन्त्रीको राजीनामा नमागेर छानबिन समिति बनाउन माग गरेकोसमेत बताए ।
हामीले गृहमन्त्रीको राजीनामा मागेका होइनौं, संसदीय छानबिन बनाऔं, सहकारी ठगीमा उहाँको संलग्नता नदेखिए उहाँ गृहमन्त्री रहिरहनुहुनेछ । तर, संसदीय समिति बनाउन सरकार किन डराएको ? कोइरालाले भने ।
अर्को प्रसङ्गमा कोइरालाले चौतर्फी रूपमा देश अप्ठ्यारो परिस्थितिबाट गुज्रिरहेकोले नेताहरूले देशको माटो र जनतालाई सम्झेर संवेदनशील र जिम्मेवार हुनुपर्ने बताए ।
निर्वाचन प्रणाली परिवर्तन गरेर देशलाई निकास दिन संघीय संसदको पहिलो दल कांग्रेस र दोस्रो दल एमाले एक ठाउँमा उभिनुपर्ने उनको भनाई छ ।
