बिराटनगर । मदन भण्डारी राजमार्ग दुई दिनदेखि अवरुद्ध बनेको छ ।
उदयपुरको उदयपुरगढी गाउँपालिका–६ मौवासी र राईटोलमा खसेको पहिरो पन्छाउन ढिलाइ हुँदा सडक अवरुद्ध बनेको हो ।
बिहीबारदेखि परेको अविरल वर्षा र शनिबार रातिदेखि पहिरो खसेर मदन भण्डारी राजमार्ग अवरुद्ध भएको उदयपुरगढी गाउँपालिकाका उपाध्यक्ष जीत बहादुर खड्काले जानकारी दिए ।
उनले राजमार्ग खुलाउन गाउँपालिकाले दुईवटा ब्याक लोडर परिचालन गरे पनि पहिरो खुलाउन नसकिएको बताए ।
पूर्व–पश्चिम महेन्द्र राजमार्ग अन्तर्गत सुनसरी र सप्तरी खण्ड जोड्ने कोशी ब्यारेजमा समेत गए रातीदेखि सवारी आवागमन रोकिएको छ ।
महेन्द्र राजमार्गको विकल्पमा रहेको मदन भण्डारी राजमार्ग समेत दुई दिनदेखि अवरुद्ध हुँदा अत्यावश्यकीय सेवा दिने यातायात साधन र सर्वसाधारण यात्रुहरु मारमा परेका छन् ।
