मकवानपुर । बाराको जितपुर सिमरा उपमहानगरपालिका-२२ अम्लेखगन्जमा यात्रुबाहक बस दुर्घटना हुँदा मृत्यु हुने १६ मध्ये ९ जनाको सनाखत भएको छ ।
मृतकमध्ये हेटौंडामा उपचारको क्रममा ज्यान गुमाएका ९ जनाको सनाखत भएको हो । मकवानपुरका प्रहरी उपरीक्षक बामदेव गौतमका अनुसार बस दुर्घटनामा परि ज्यान गुमाउने हरुमा पर्साको विरगन्ज–१६ का सकेमप्रसाद चौरसिया,सोही स्थानकी मुन्नीदेवी चौरसिया, बाराको कलैया–१० का नगरीन खातुन, बाराको जीतपुर सिमरा-२२ अमलेखगञ्जका सुरेश विक, बाराको कलैया उपमहानगरपालिकाका इन्ताज अन्सारी रहेका छन् ।
यसैगरि अन्य मृतकहरुमा मकवानपुरको हेटौँडा उपमहानगरपालिका–७ की ५५ वर्षीया शुभलक्ष्मी श्रेष्ठ, २० वर्षीया स्वस्तिका श्रेष्ठ, ओखलढुङ्गाका ४५ वर्षीय लालबहादुर बोगटी, र गोरखा जिल्लाकी अम्बिका कँडेल रहेका छन् ।
दुर्घटनामा परि गम्भीर घाइतेमध्ये १३ जनाको हेटौंडाकै विभिन्न अस्पतालमा उपचार भइरहेको बाराका प्रहरी प्रवक्ता डिएसपी राजेश थापाले जानकारी दिए ।
बिहीबार बिहान नारायणघाटबाट बीरगन्जतर्फ आउँदै गरेको बा प्र ०६-००१ ख ०११० नम्बरको बस दुर्घटनामा परेको थियो । ५१ जना यात्रु सवार बस बिहान साढे १० बजेको समयमा जीतपुर सिमरा उपमहानगरपालिका–२२ अमलेखगञ्जस्थित ३ नम्बर पुलबाट खोलामा खसेको थियोे ।
