काठमाडौं । नेकपा माओवादी केन्द्रले गृहमन्त्री रामबहादुर थापा बादललाई पनि पार्टीबाट हटाएर कारबाही गरेको छ ।
माओवादीले बादलले पार्टी त्यागेको जानकारी संसद् सचिवालयलाई दिएको हो । संसद् सचिवालयका सह–प्रवक्ता दशरथ धमलाले दिएको जानकारीअनुसार बादललाई कारबाही गरिएको पत्र शुक्रबार दिउँसो दर्ता भएको हो ।
यो कारबाहीसँगै अब बस्ने राष्ट्रियसभा बैठकमा राजनीतिक दलसम्बन्धी ऐनअनुसार गृहमन्त्री बादलको राष्ट्रियसभा सदस्य पद रिक्त हुनेछ ।
यसअघि, माओवादी केन्द्रले प्रतिनिधिसभाका सांसदहरु लेखराज भट्ट, टोपबहादुर रायमाझी, प्रभु शाह र गौरीशंकर चौधरीलाई कारबाही गरेको थियो ।
उनीहरूलाई पार्टीले गरेको पत्र सभामुख अग्निप्रसाद सापकोटाले सदनलाई जानकारी गराएसँगै उनीहरूको सांसद र मन्त्री पनि गुमेको छ ।
