बिर्तामोड । झापाको कमल गाउँपालिकाद्वारा इलाका प्रहरी कार्यालय दमकलाई सवारी साधन हस्तान्तरण गरिएको छ ।
गत भदौ २३ र २४ गते जेनजी आन्दोलनका कारण देशै भर ठुलो मात्रमा सरकारी कार्यालय र सवारी साधनमा तोडफोड र आगजनी भएको थियो । सोहि क्रममा दमक स्थित इलाका प्रहरी कार्यालयमा भएको आगजनीका कारण कार्यालय भवन र सवारी साधनमा पुर्ण रुपमा जलेर नष्ट भएको थियो ।
आन्दोलनबाट उत्पन्न विषम परिस्थितिको समयमा इलाका प्रहरी कार्यालय, दमक झापाको सबै सवारी साधनहरुमा क्षति पुगेको र शान्तीसुरक्षाको दृष्ट्रिकोणबाट सवारी साधन अति आवश्यक भएकोले पालिकाले सवारी साधन हस्तान्तरण गरिएको गाउँपालिकाले जनाएको छ ।
मुख्यमन्त्री अत्यावश्यक सेवा केन्द्र (प्रदेश सरकार र स्थानीय तहको सहकार्यमा सञ्चालित) अन्तर्गत प्रदेश सरकार आन्तरिक मामिला तथा कानून मन्त्रालय, विराटनगरबाट कमल गाउँपालिकालाई प्राप्त भएको प्र.१–०२–००१ झ ०७३० नम्बरको पिकअप भेन कमल गाउँपालिकाका प्रमुख प्रशासकिय अधिकृत केशव कुमार ढकाल मार्फत ईलाका प्रहरी कार्यालय दमकका प्रमुख, प्रहरी नायव उपरिक्षक (डिएसपी) रामप्रसाद तिम्सिनालाई चाबी हस्तान्तरण गरिएको हो ।
प्रहरी कार्यालयले अर्को सवारी साधनको व्यवस्था नगरुन्जेल सम्म वा कमल गाउँपालिकालाई आवश्यक भएको समयमा पुनः फिर्ता लिने सक्ने गरी अहिले तत्काललाई आफु मातहतमा रहेको प्रहरी भ्यान ईलाका प्रहरी कायालयलाई हस्तान्तरण गरिएको हो र र यसले प्रहरीलाई दैनिक कार्य सञ्चालनमा सहज र शान्ति सुरक्षा कायम गर्न मद्दत पुग्ने प्रमुख प्रसाशकिय अधिकृत ढकालले बताउनुभयो ।
