झापा-सेयर बजारमा लगानीकर्ताहरूका लागि एउटा नयाँ र आकर्षक अवसर ढोकामा आइपुगेको छ । कोशी प्रदेशको सबैभन्दा ठूलो सौर्य ऊर्जा परियोजना, झापा इनर्जी लिमिटेडले सर्वसाधारणका लागि प्राथमिक सार्वजनिक निष्कासन (IPO) जारी गर्ने तयारीलाई अन्तिम रूप दिएको हाे ।
नेपाल धितोपत्र बोर्ड (SEBON) को टोलीले झापाको शिवसताक्षी नगरपालिका-४, सालमारामा अवस्थित १० मेगावाट क्षमताको परियोजनाको स्थलगत अनुगमन तथा निरीक्षण सम्पन्न गरेपछि IPO स्वीकृतिको प्रक्रिया अगाडि बढेको प्रबन्ध सञ्चालक सुवास भट्टराईले बताउनु भयो ।
कम्पनीका प्रवन्ध सञ्चालक भट्टराईका अनुसार, धितोपत्र बोर्डको स्थलगत निरीक्षण सकारात्मक रहेको र अब छिट्टै IPO निष्कासनका लागि अन्तिम स्वीकृति पाउनेमा कम्पनी विश्वस्त छ ।
‘हामीले सम्पूर्ण प्रक्रिया पूरा गरिसकेका छौं। बोर्डको निरीक्षणपछि अब छिट्टै अनुमति पाउने अपेक्षा राखेका छौँ’, भट्टराईले भन्नुभयो, ‘यो परियोजनामा आमसर्वसाधारणलाई पनि हिस्सेदार बनाउन हामी आतुर छौँ ।’
परियोजनाको लागत र विशेषता
परियोजनाको वास्तविक लागत करिब ८७ करोड रुपैयाँ रहेको कम्पनीले जनाएको छ । यो कोशी प्रदेशमा हालसम्म सञ्चालनमा आएको सबैभन्दा ठूलो सौर्य परियोजना हो । यस परियोजनाका मुख्य विशेषताहरू निम्न छन् :
क्षमता: १० मेगावाट
स्थान: शिवसताक्षी नगरपालिका-४, सालमारा, झापा
लगानी: करिब ८७ करोड रुपैयाँ
प्रविधि: अत्याधुनिक सोलार प्यानल र ग्रिड-कनेक्टेड प्रणाली
विद्युत खरिद सम्झौता (PPA): नेपाल विद्युत प्राधिकरणसँग PPA सम्पन्न भई उत्पादित बिजुली राष्ट्रिय प्रसारण लाइनमा जोडिसकिएको छ।
बिक्री प्रबन्धक: कम्पनीले IPO निष्कासन तथा बिक्री प्रबन्धकको जिम्मेवारी मुक्तिनाथ क्यापिटल लिमिटेडलाई दिएको छ।
किन महत्त्वपूर्ण छ यो IPO?
नेपालको ऊर्जा क्षेत्र अधिकांश जलविद्युतमा निर्भर रहँदा, झापा इनर्जी जस्ता सौर्य परियोजनाले ऊर्जा मिश्रणमा विविधता ल्याउन महत्त्वपूर्ण भूमिका खेल्छन् ।
विशेष गरी सुक्खायाममा नदीमा पानीको बहाव घट्दा जलविद्युत उत्पादन कम हुन्छ, यस्तो अवस्थामा सौर्य ऊर्जाले विद्युत् आपूर्तिलाई स्थिर बनाउन मद्दत गर्दछ।
यस परियोजनाले स्थानीय स्तरमा रोजगारी सिर्जना गर्नुका साथै प्रदेशको आर्थिक विकासमा समेत टेवा पुर्याएको छ । निजी क्षेत्रको लगानीमा निर्माण भएको यो विशाल परियोजनाले अन्य लगानीकर्ताहरूलाई पनि नवीकरणीय ऊर्जामा लगानी गर्न प्रोत्साहित गर्ने देखिन्छ ।
लगानीकर्ताहरूले अब छिट्टै कोशी प्रदेशको यो अग्रणी ऊर्जा परियोजनाको सेयरमा लगानी गर्ने अवसर पाउनेछन् । कम्पनीले छिट्टै आह्वानपत्र प्रकाशित गरी आवेदन खुला गर्ने मिति सार्वजनिक गर्ने जनाएको छ ।
