अष्ट्रेलियाको बेरोजगारी दर जनवरीमा थोरै बढेर ४.१ प्रतिशत पुगेको छ । जुन डिसेम्बरमा ४.० प्रतिशत थियो । आधिकारिक तथ्याङ्कअनुसार श्रमशक्ति सहभागिता दरले रेकर्ड उच्चतम स्तरमा पुगेको छ ।
अष्ट्रेलियाली तथ्याङ्क ब्युरोद्वारा जारी तथ्याङ्कअनुसार डिसेम्बर र जनवरीको बीचमा रोजगारी प्राप्त अष्ट्रेलियालीहरूको संख्या ४४ हजारले बढेर १४.६३ मिलियन पुगेको छ । जबकि सक्रिय रूपमा काम खोजिरहेका बेरोजगारहरूको संख्या २३ हजार ४ सयले बढेर ६ लाख २७ हजार ५ सय पुगेको छ ।
फलस्वरूप कार्यबल सहभागिता दर – रोजगारी प्राप्त वा काम खोजिरहेका काम गर्ने उमेर समूहको जनसंख्याको अनुपातको मापन – जनवरीमा ६७.२ प्रतिशतबाट बढेर ६७.३ प्रतिशतको नयाँ रेकर्ड उच्चतम स्तरमा पुगेको छ ।
श्रम तथ्याङ्क प्रमुख ब्योर्न जार्विसले जनवरीमा सहभागिता दर जनवरी २०२४ को तुलनामा ०.८ प्रतिशत बिन्दुले बढी र मार्च २०२० को तुलनामा १.८ प्रतिशत बिन्दुले बढी रहेको बताउनु भयो । जनवरीमा रोजगारी–जनसंख्या दर पनि ६४.६ प्रतिशतको नयाँ रेकर्डमा पुगेको छ । उहाँले जनवरीमा रोजगारी र बेरोजगारीमा भएको अधिकांश वृद्धि महिलाहरूद्वारा सञ्चालित भएको बताउनु भयो । कोषाध्यक्ष जिम चाल्मर्सले तथ्याङ्कलाई धेरै उत्साहजनक भनेर वर्णन गर्नुभयो ।
२०२२ मा वर्तमान सरकारले सत्ता जितेदेखि ११ लाखभन्दा बढी रोजगारी सिर्जना भएको छ । जनवरीमा रोजगारी प्राप्त अष्ट्रेलियालीहरूको संख्यामा खुद वृद्धि भएपनि डिसेम्बरदेखि काम गर्ने घण्टाको कुल संख्या ०.४ प्रतिशतले घटेको छ ।
सिन्ह्वाको सहयोगमा न्युज एजेन्सी नेपालले तयार पारेको समाचार सामग्री ।
