बिर्तामोड । झापाको बुद्धशान्ति गाउँपालिका वडा नं. ४ स्थित हापेन चोकमा बोलेरो र अटो ठोक्किँदा एक जनाको मृत्यु भएको छ । तीनजना घाइते भएका छन्।
चारआलीबाट इलामतर्फ जाँदै गरेको बोलेरो गाडी प्र.१–०१–००१ ज ३८५१० र विपरीत दिशाबाट आइरहेको अटो प्र.१–०१–००२ ह ३६३० आपसमा ठोक्किँदा दुर्घटना भएको हो।दुर्घटनामा परि अटोमा सवार बुद्धशान्ति गाउँपालिका वडा नं. ४ की २७ वर्षीय अमृता तामाङको मृत्यु भएको छ। घाइते अवस्थामा भद्रपुरस्थित प्रादेशिक अस्पताल पुर्याइएकी तामाङलाई चिकित्सकले मृत घोषणा गरेका हुन्। घटनामा अन्य तीनजना घाइते भएका छन्। अटोमा सवार २१ वर्षीया कृतिका तामाङको अनुहारमा चोट लागेको छ। ४१ वर्षीया मञ्जु तामाङको दायाँ खुट्टामा चोट लागेको छ। बोलेरोका चालक मेचीनगर नगरपालिका–१२ निवासी ४० वर्षीय दिलकुमार माझीको दायाँ हातमा चोट लागेको छ। तीनै जनाको उपचार बुधबारेस्थित सिटी अस्पतालमा भइरहेको छ । दुर्घटनापछि इलाका प्रहरी कार्यालय बुधबारेबाट प्रहरी निरीक्षक सुवास शेर्पाको नेतृत्वमा टोली खटिएको थियो। दुवै सवारीसाधन र अटो चालकलाई नियन्त्रणमा लिई इलाका प्रहरी कार्यालय बुधबारेमा राखिएको छ।
