झापा । नेकपा एमालेका अध्यक्ष केपी शर्मा ओलीले लोकतन्त्रको रक्षाका विषयमा फुर्ती नगर्न नेपाली कांग्रेसलाई चेतावनी दिनुभएको छ ।
एमाले झापाको ११ औं अधिवेशन उद्घाटन गर्दै पार्टीका केन्द्रीय अध्यक्ष तथा पूर्वप्रधानमन्त्री केपी शर्मा ओलीले विगतका दिनमा कांग्रेसकै शासनका बेला वामपन्थी पार्टीहरूमाथि भएका आक्रमण र परिस्थितिले कांग्रेस लोकतान्त्रिक पार्टी नभएको दाबी गर्नुभयो ।
नेपालमा पञ्चायतविरुद्ध कहीँ कतै आन्दोलन गर्ने वातावरण नभएका बेला आफूहरूले विद्रोहमार्फत झापाबाट आन्दोलन शुरु गरेको उहाँले बताउनुभयो । झापा विद्रोहमार्फत आन्दोलन गर्दै पञ्चायती शासन व्यवस्थालाई घुँडा टेकाएको उहाँले बताउनुभयो बताउनुभयो । नेपालमा वामपन्थी विद्रोहले देशलाई सही बाटो दिएको ओलीको दाबी थियो ।
आफूले अहिले पनि पार्टीमा गलत नीति अवलम्बन नगरेको ओलीले दाबी गर्नुभयो । ती नीतिहरूलाई कसैले गलत भन्छ भने बहस गर्न आफू तयार रहेको उहाँको भनाइ थियो । मिसन ८४ का लागि अर्जुनदृष्टि राखेर काम गर्न पार्टीका नेता तथा कार्यकर्तालाई उहाँले निर्देशन दिनुभयो ।