विराटनगर । कोशी प्रदेशका मुख्यमन्त्री उद्धव थापाले विश्वासको मत लिन लाग्दा प्रदेशकी उपसभामुख सिर्जना दनुवार काठमाडौँ लाग्नुभएको छ ।
उपसभामुख दनुवार आज बिहान ८ बजेको यति एयरलाइन्सको फ्लाइटबाट काठमाडौँ जानुभएको हो । मुख्यमन्त्री थापाले विश्वासको मत लिने प्रयोजनका लागि आज बैठक बोलाइएको थियो । उहाँले प्रदेशसभा सचिवालयलाई आफू आज बैठकमा उपस्थित हुन नसक्ने जानकारी समेत गराउनुभएको छ ।
मुख्यमन्त्री थापाले विश्वासको मत लिने प्रयोजनका लागि प्रदेशसभा सचिवालयमा आइतबारका लागि समय माग गर्नुभएको थियो । तर उपसभामुख दनुवारले भने एक दिन पछि सोमबारका लागि समय तय गर्नुभएको थियो ।
मुख्यमन्त्रीले विश्वासको मत लिने बैठकको अध्यक्षता नगर्ने भन्दै उहाँ काठमाडौँ जानुभएको हो । उहाँले आजै बिहान ८ बजेका लागि कार्यव्यवस्था परामर्श समितिको बैठक समेत बोलाउनु भएको थियो ।
एमालेबाट निर्वाचित उपसभामुख दनुवारलाई एमालेले बैठकमा उपस्थित नहुन निर्देशन पनि दिएको थियो । दनुवारले आइतबार बेलुका नै काठमाडौँ जान खोजेपनि ढिलो भएका कारण जहाजको टिकट नपाएकोले आज विहान साढे ८ बजे यति एयरको विमानबाट काठमाडौँ गएको बुझिएको छ ।
