राष्ट्रिय महिला आयोगका अध्यक्ष कमला कुमारी पराजुलीले हालै भएको निर्वाचनमा उल्लेख्य संख्यामा महिलाहरू प्रत्यक्ष निर्वाचित भएर आएकोले यसले समाज र राजनीतिमा सकारात्मक सन्देश दिएको बताउनुभएको छ ।
११६ औँ अन्तर्राष्ट्रिय महिला दिवसका अवसरमा आईतवार सिंहदरबारमा आयोजित कार्यक्रममा उहाँले महिलाले चुनाव जित्दैनन् भन्ने मान्यतालाई यो निर्वाचनले तोडिदिएको बताउनुभएको हो ।
उहाँले प्रतिनिधि सभा सदस्यको निर्वाचनमा सामान्य तथा सार्वजनिक जीवनमा धेरै पहिचान नबनाएका महिलाहरूले ‘हेभीवेट’ भनिएका पुरुष उम्मेदवारलाई पराजित गरेको बताउनु भयो । अध्यक्ष पराजुलीकाअनुसार राजनीतिक दलहरूले लामो समयदेखि महिलाले चुनाव लड्न सक्दैनन्, जित्न सक्दैनन् र उनीहरूमा नेतृत्व क्षमता छैन भन्ने धारणा राख्दै आएका थिए ।
तर निर्वाचन परिणामले ती धारणालाई चुनौती दिएको उहाँले बताउनु भयो । यसले महिलाहरूलाई अवसर दिएमा उनीहरू अगाडि आउन सक्छन् भन्नेकुरा कुरालाई प्रमाणित गरेको उहाँले बताउनु भयो ।
अध्यक्ष पराजुलीले निर्वाचन अभियानका क्रममा सुशासन, विकास र परिवर्तनका विषयमा व्यापक चर्चा भएपनि राजनीतिक दलका घोषणापत्रहरूमा लैङ्गिक समानता, महिला अधिकार, लैङ्गिक न्याय, महिला सशक्तिकरण तथा महिलाको पहुँचका विषय भने समेटिन नसकेको उल्लेख गर्नुभयो । उहाँकाअनुसार देश निर्माण र परिवर्तनको बहस चलिरहँदा महिलासम्बन्धी मुद्दा नउठाइनु गम्भीर विषय हो ।
अध्यक्ष पराजुलीले आगामी दिनमा राजनीतिक दलहरूले नीति तथा कार्यक्रम बनाउँदा लैङ्गिक समानता र महिला अधिकारका विषयलाई प्राथमिकतामा राख्नुपर्नेमा जोड दिनुभयो ।
