विराटनगर । नेकपा एमालेको कोशी प्रदेश प्रथम अधिवेशन आजदेखि प्रदेश राजधानी विराटनगरमा शुरु हुँदैछ । अधिवेशनको सम्पूर्ण तयारी पूरा भएको आयोजक समितिले जनाएको छ ।
अधिवेशन आयोजक मूल समितिले बिहीबार विराटनगरमा पत्रकार सम्मेलन गरी तयारीबारे जानकारी गराएको हो । पार्टीका प्रदेश कमिटी अध्यक्ष तुलसीप्रसाद न्यौपानेले मनोनीत बाहेकका प्रतिनिधि छनोटको कार्य पूरा भएको बताउनुभयो । अधिवेशन पार्टी अध्यक्ष केपी शर्मा ओलीले उद्घाटन गर्नुहुनेछ ।
अधिवेशन दुई दिनसम्म सञ्चालन हुनेछ । अधिवेशनमा १३७ पालिका, २३ जनवर्गीय संगठन, दलित, मजदुर समेत गरी १०४७ प्रतिनिधि र पर्यवेक्षक सहभागी हुने जनाइएको छ ।
पार्टीका प्रदेश इन्चार्ज रघुवीर महासेठले अधिवेशनले पार्टीको आन्तरिक जीवन व्यवस्थित गर्ने बताउनुभयो ।
अधिवेशन सम्पन्न गर्न मूल व्यवस्थापन समिति, अनुगमन निर्देशन समिति र १२ वटा उपसमिति बनाइएको छ । अधिवेशन लागि ९९७ प्रतिनिधि चयन भए पनि त्यसको पाँच प्रतिशत प्रतिनिधि चयन हुन सकेको छैन ।
अधिवेशनबाट पाँच पदाधिकारीसहित २१५ सदस्यीय कमिटी चयन गरिने जनाइएको छ । प्रचार उपसमिति संयोजक शैलेश लामाले अधिवेशनले राजनीतिक वृत्तमा महत्वपूर्ण सन्देश प्रवाह गर्ने बताउनुभयो ।
