काठमाडौं । नागरिकता विधेयकलाई अन्तिम रुप दिन संघीय संसदको राज्य व्यवस्था तथा शुसासन समितिको बैठक आज बस्दै छ ।
दिउँसो २ बजे बस्ने बैठकमा दुई वर्षदेखि अल्झिएको नागरिकता विधेयकलाई सकेसम्म सहमति र नभए प्रक्रियाद्धारा टुंगो लगाइने सांसदहरुले दाबी गरेका छन् ।
यस अघि हिजो सत्तारुढ नेकपाको सचिवालय बैठकले नेपालमा विवाह गरी आउने विदेशी महिलालाई ७ वर्षपछि सम्बन्धित देशको नागरिकता त्यागेको प्रमाण पेश गरेपछिमात्र अंगीकृत नागरिकता दिने निर्णय गरेको थियो ।
सोही अनुसार समितिले निर्णय लिने बताइएको छ । तर, नेपाली कांग्रेस र मधेशवादी दलहरुले भने वर्तमान नागरिकता ऐन, २०६३ कै प्रावधान राख्नुपर्ने अडान राख्दै आएका छन् ।
