सत्तापक्षले एमालेलाई भ्रस्टाचारको आधारहीन आरोप लगायोः ओली


१२ जेष्ठ २०८०, शुक्रबार २०:१० मा प्रकाशित

काठमाडौं । नेकपा एमालेका अध्यक्ष केपी शर्मा ओलीले सत्तापक्षले एमालेमाथि आधारहीन आरोप लगाएर जनतामा भ्रम पार्ने काम गरेको बताउनुभएको छ ।

शुक्रबार एमाले पार्टी कार्यालय च्यासलमा आयोजित एमालेबाट निर्वाचित जनप्रतिनिधिहरुको प्रशिक्षण कार्यक्रममा ओलीले सत्तापक्षले नियोजित रुपमा आधारहित आरोप लगाएर संसद जस्तो गरिमामय ठाँउबाट एमालेबिरुद्ध जनतामा भ्रम पार्ने काम गरेको बताउनुभएको हो ।

आफूले जिन्दगीभर भ्रष्टाचारविरुद्धको अभियान चलाएर आएको भन्दै इमानका शत्रुहरुले तथ्यहीन आरोप लगाउन खोजको उहाँले बताउनुभयो । अध्यक्ष ओलीले पशुपतिको जलहरी र औषधीमा भ्रष्टाचार भएको बिषयमा पुष्टि हुने कुनै आधार नै नभएको भन्दै संसद अवरुद्ध गर्नुपरेको जिकिर गर्नुभयो । उहाँले नक्कली भुटानी शरणार्थी प्रकरणमा एमाले र आफू नजिक भएका व्यक्तिहरुको नाम पोल्न लगाएको र प्रचार गर्न लगाएको टिप्पणी गर्नुभयो ।

शरणार्थी प्रकरणमा एमालेको कुनै संलग्नता नरहे पनि एमालेतर्फ बाढी फर्काउन खोजेको उहाँको भनाइ छ । ओलीले एक बर्ष अघि नै शरणार्थी प्रकरणमा उजुरी आएपछि गुपचुप राखेर मिलाउन खोजेको आरोप लगाउनुभयो । उहाँले एमालेबिरुद्ध हिलो छ्याप्ने र आरोपित गर्ने प्रयास हुनसक्ने भन्दै सजग हुनुपर्ने बताउनुभयो ।

उहाँले आफू पूर्व जाँदा ढुङ्गा हानेर मार्ने प्रयास गरे पनि उनीहरुलाई प्रहरीले नियन्त्रणमा लिन नसकेको र सरकारले नै हिंसालाई बढावा गरिरहेको बताउनुभयो । ओलीले वर्तमान सरकारको भूमिका एमालेको विरुद्धमा काम गर्ने मात्रै रहेको पनि बताउनुभयो ।

LEAVE A REPLY

Please enter your comment!
Please enter your name here